【行山中難度路線:花香爐頂探巨型石室奇景!】

小編除咗行山之外,最鍾意就係探索奇石,今次介紹呢條路線,可以一次行晒兩個地點,包括有巨型石室,同埋一隻巨型小豬。

由屯門港鐡站K52巴士到總站,由龍鼓灘出發,經過鐡皮廠小路上山,行咗十幾分鐘就到達滑浪板石,對面有一大石坡,都幾斜架! 順住慢慢跣住落,到達一個小竹林,穿過就見倒修女看書石室入口,先捐過一個好窄嘅山窿,入面有好多天窗,有啲光線射落離,唔洗用頭燈都睇得好清楚,仲有幾個出口位置,四通八達,有啲要琴上琴落,穿穿插插,有個出口更要爬樹藤落,的確好好玩,不過消耗唔小體力,打完卡再上花香爐頂,33度高温無樹蔭,山徑極度風化,散沙碎石滿佈,好似沙漠咁,行得好辛苦,當日小編行行吓,覺得個頭開始赤赤哋,應該係中暑先兆,立即走去巨石背後喝水休息,15分鐘後,精神充份恢復後才再起步, 一直向上走,卒之上到花香爐頂,散沙相當跣,為咗平衡每步都花一定體力。好不容易去到豬仔石,外型真係勁似一隻巨型豬仔,再細心揾揾.原來豬肚下就係十字星石室,要慢慢一層一層爬落去,落到底部就找倒十字星石,小編在網上見到有好多山友琴上去打卡,但發確其實都幾高幾跣吓,所以冇琴上去了! 打完卡再返回龍鼓灘,巧遇日落美景,嘩! 真係巧令令喔! 今次行程可以一次過滿足多個願望,真係不枉此行。

▲修女看書石-必須由龍鼓灘中華白海豚瞭望臺望過去至可以睇到佢全貎

▲由龍鼓灘起步經過鐵皮廠沿小路直上大約十幾分鐘就到達

▲好快就到達滑浪板石

▲滑浪板石對面有一塊大石坡慢慢跣落去再經過竹林就到達修女看書石室入口.

▲入口相當狹窄但裏面就好寬敞有多個出口四通八達仲有天窗唔需要頭燈都睇得好清楚

▲石室內有部分石頭呈現淡紅色和淺綠色-透過天窗光線照射顏色與光線起了變化非常之美麗

▲修女看書石室由幾塊超巨型嘅大石組合而成

▲修女看書石室由幾塊超巨型嘅大石組合而成

▲其中一個出口非常狹窄僅僅夠一個人通過

▲呢度需要小心可以拉住樹藤緩緩而下

▲出了洞口原來別有洞天仲有另一個石室可供探究

▲走過石縫離開石室去另ㄧ景點

▲跟隨絲帶引路,穿越樹林

▲部分路段極度風化-上落相當跣腳必須要小心

▲由於當日太陽十分猛烈沿途又沒有大樹遮蔭曝曬之下小編都感覺到有輕微中暑跡象

▲布青蛙石

▲貓尾草,中藥名為布狗尾

▲青山一帶奇石甚多

▲豬仔石真係栩栩如生-外型真的很像一隻小肥豬俯伏在地上.

▲十字星石打卡熱㸃

注意事項:

⚠部分路段極度風化,上落會比較跣,要小心慢行
⚠ 建議先下載行山地圖,使用GPS識別方向
⚠ 必需有豐富行山經驗人仕帶領
⚠風高物燥切勿吸煙留下火種, 釀成火災後果嚴重⚠ 愛護郊野清潔人人有責自己垃圾自己帶走

花香爐頂

路線: 龍鼓灘巴士站>修女看書石室>花香爐頂>豬仔石>十字星石>龍鼓灘
全程8公里, 需時約4小時

地圖參考:https://bit.ly/2P3qYsj