【行大浪坑山澗!探尋靈會山隱世飛龍!】

[駐場博客 @小牛牛快樂行山郊遊相集by Chan Keung]在網上傳聞,位於靈會山一帶,有一座寺院隱藏在山林中,而呢座寺院附近仲一條飛龍,神出鬼沒,充滿神秘感,聽聞好人都上山尋訪,但好多人都徒勞無功 ,所以今次决定查過究竟呢!

點搭車去靈會山?

東涌巴士總站坐11號或23號巴士,到咗石𤩹水塘站落車,進入宏貝道,再轉入鳯凰徑8段,沿一條藍色引水道一直走, 好快就見倒一條金屬通道,横過之後再沿山邊走,到達大浪坑入口處,有絲帶記號,入澗後,發現入口比一般石澗較為窄一啲,周邊植物長得十分茂盛,今天水源充沛,下源大小水潭水位已經十分高漲,如果唔想濕腳,可以穿梭兩旁山徑,不過呢度可能較少人行,所以樹藤雜草密佈,又有好多蜘蛛網,有時都要攀爬大石避開密集叢林,行咗一小段已經大汗疊細汗, 有不小石頭都佈滿苔蘚,必需小心慢行,讓小編可以慢慢欣賞沿途美景。雖然大浪坑澗度很短,但係琴上琴落,都消耗了不小體力喔! 離澗後接返羌山郊遊徑, 其實是靠靈會山腰横行,呢度可以俯瞰分流一帶,風景開掦優美。好快走到分岔路口~分水坳,呢度可以上𩆜會山頂,煎魚灣,分流,萬丈瀑,水澇漕多條路線, 今次選擇住萬丈瀑方向,進入鳯凰徑5段, 一直沿山徑走,行到L047標柱,靠右邊發現有一條隱徑,有絲帶引路,大約走多百多米之後,就能到達。

隱世飛龍活靈活現

今次行程主要想揾嘅飛龍, 呢條飛龍隱藏於深山之中, 想搵倒佢都要響網上面搜集資料做下功課, 當發現佢時真係好開心,仲可以近距離接觸, 雖然呢條飛龍已經建築咗一段時間,但係龍身上面嘅油漆依然十分光澤, 造型栩栩如生 ,據説呢條飛龍係慈興寺所建造的,所以一同隱藏於深山中,

拍完照後,小編貪快,揾咗另一條隱徑穿林離開,點知行咗一段好長嘅山路,發覺越離越唔對勁, 雜草樹藤頻生,棘手棘腳,路杯漸漸消失,山徑就越嚟越唔明顯,結果穿林變成爆林,爆咗一段漫長嘅樹藤,雜草,繩網陣嘅密林,超焗超熱好辛苦,最後費盡体力才能走番出郊遊徑,好彩無中暑咋,下次都係唔好貪快! 繼續再沿鳳凰徑5段 去到龍仔悟園,呢度以前小編都嚟過,記得當時呢條九曲橋冧咗, 日久失修所置掛! 但係今次呢度就完全唔同晒, 條橋已經起返好曬,四周圍都修復過晒! 湖水清澈,仲有靚靚倒影添!令人一見難忘喔! 影影吓發覺已經6點幾,速腳走人, 途中發現金蟬脫殼,行咗幾年山都係第一次見, 跟住好快落山去到大澳海濱長廊,剛剛日落magic time, 迷人美景,十分浪漫,真係大滿足,在大澳碼頭仲有2隻牛牛,同佢哋合照後完成旅程。

▲石壁水塘起步,進入鳳凰徑8段,旁邊是一條藍色的引水道

▲進入大浪坑入口開揚

▲大浪坑下源水質清澈

▲如果唔想濕腳,就要穿越叢林

▲行走石澗必須步步為營小心滑倒

▲大浪坑有多個大小水潭

▲石澗兩旁長滿雜草樹藤

▲充滿原始風味

▲沿途只有小量絲帶作路標

▲路旁小花

▲行石澗有ㄧ定危險新人不宜

▲小蜻蜓被蜘蛛網,痴住對翼,幫佢解開重獲自由.

▲離開澗道

▲進入羌山郊遊徑

▲到達分水坳接上鳳凰徑5段

▲烈日當空切記做好防曬措施每人最少帶2至3公升水

▲穿過樹林隱徑卒之發現飛龍

▲飛龍位於慈興寺旁邊ㄧ同隱居在深山中

▲經過竹棚右轉進入龍仔悟園

▲以前小編到訪的時候發現條橋係冧咗但係現時已經修復返好了

▲落山後到達大澳海濱長廊巧遇日落美景

▲日落magic-time.

路線: 石壁水塘>大浪坑>羌山郊遊徑>分水坳>靈會山>飛龍>龍仔悟園>鳯凰徑5段>大澳 全程約13K 需時約6小時

注意:
⚠行石澗有ㄧ定危險性,新手不宜
⚠天氣炎熱必需夠充足飲用水,平均每人約2~3公升
⚠做足防曬措施
⚠保持郊野清潔人人有責,自己垃圾自己帶走

  文字/圖片來源 :小牛牛快樂行山郊遊相集by Chan Keung