香港人遊香港

【大生圍魚塘+信芯園2萬棵太陽花!】

[駐場博客 @小牛牛快樂行山郊遊相集by Chan Keung]早兩日上網睇倒,有人登錄火星!? 原來係大生圍魚塘照片,的確有趣,再上網搜尋,原來好近信芯園, 趁未有狂風大雨,今日立即出發,一次過到訪兩個美景!
趁今日天氣好好,去屏山食完早餐,坐港鐵去朗屏站落車, 再去到福德街專線小巴站,坐36號小巴,大約二十分鐘到總站~大生圍, 落車轉左有個大魚塘,沿塘邊走,呢度風景已經好靚,沿途仲見到好多茘枝樹,又有蓮霧樹,仲有芒果樹, 走過兩個魚塘後轉左,沿住松濤南路魚塘邊ㄧ直走,靠左第四個路口轉左,直行兩個路口就到達呢個”火星”魚塘。離遠已經見倒好人影相,長短伙樣樣出齊,望上天空仲有幾架航拍機響頭壳頂飛來飛去, 小編無理咁多,即刻衝落去拍照,點知地下啲浮泥好鬆軟,一踩落去就成隻鞋沉咗落去泥底, 唯有影相唔好行到咁出,因為唔想踩爛呢啲咁特別嘅圈圈, 根據網上報導,魚塘負責人話, 魚塘需要定期抽走曬啲水,用陽光殺菌,而魚塘底部嘅圈圈,其實係鯽魚產卵時形成的,不過啲水抽走晒, 圈圈就呈現出嚟, 呢啲圈圈外型奇特,影落去好似外太空星球表現,所以吸引倒好多市民蜂擁嚟拍照, 小編影到部手機無乜電,就徒步行返出去錦繡花園外面,近青山公路坐76K巴士, 坐到去石湖圍落車,沿地下通道行過對面馬路,見到路邊有個手寫路牌, 寫住 “信芯園” 跟住啲路牌,沿小徑行咗大約五百公尺之後,就見到有好多向日葵,嘩! 巧令令呀! 諗都唔諗就攞部手機出嚟係咁影影影影, 真係好靚, 啲向日葵大概有六呎高 除外可外面影,仲可以走入花田中,穿梭拍攝,近距離接觸感覺良好! 呢度係對外開放, 而家總共種植咗兩萬棵,預計到咗夏天總共有九萬棵綻放, 不過兩萬棵已經好靚,估唔到香港都有咁靚嘅景色,周未親子娛樂又多ㄧ個熱點,除咗打卡影相之外 ,大家亦都可以購買一啲返去家中,可以幫助一吓園主~信哥,能夠每年種植更多花朵比大家去參觀喔!


▲坐36號小巴到達大生圍總站落車


▲魚塘風景相當美麗


▲出發之前建議上網搜集資料確定目的地位置


▲經過咗多個魚塘路口轉左就到達目的地


▲泥土上的圈圈好似火星表面


▲情景有如太空漫步


▲好多人都帶定長短火離拍攝仲有航拍機打卡留念


▲拍攝時小心因為部分泥土鬆軟好容易會成隻腳插曬落泥土-破壞圓形圖案.


▲離開時見到好多荔枝樹


▲仲有蓮霧樹


▲乘坐76k巴士-到達石湖圍落車行過對面馬路


▲信芯園種植了近兩萬棵向日葵


▲約有2萬棵向日葵


▲可以幫襯買返幾棵喎


▲可以幫襯買返幾棵喎


▲福壽螺嘅卵子


▲紅色交叉就是火星魚塘位置

 

大生圍魚塘+信芯園
交通: 朗屏站>福德街専線小巴站>乘坐36號小巴總站落車>步行0.7公里到達魚塘

注意:
⚠愛護山野清潔人人有責,自己垃圾自己帶走

Tagged with:     , ,

Related Articles

Follow us

合作查詢

歡迎與我們聯絡, 查詢合作