fbpx
香港人遊香港

【真係香港黎?!行山登陸綠蛋島!】

[駐場博客 @小牛牛快樂行山郊遊相集by Chan Keung]上個月去咗龍蝦灣行山,本來打算去綠蛋島,刀片脊,但係突然間落大雨,結果去唔成,好唔忿氣。難得放假遇上好天氣,今次唔可以再錯過呢!
日日都三十幾度,去行山真係好考人類意志,不過咁好天氣,無理由屈響屋企呢! 首先預備好每人2公升水,食飽飽之後,坐103號小巴出發,到咗大坳門勝記士多小食店落車,進入龍蝦灣路,全程石屎馬路,行大約一公里就到達清水灣騎術學校,呢度不時都可以近距離睇倒D馬匹,好靚架! 睇完馬匹之後沿後面小山徑落到一個石灘,呢度好多垃圾,成個石灘都係, 惨不忍倒。攀上岩石旁邊,再靠右手面有條山徑,頭段好斜,有殘繩可借力拉上,之後山徑平緩,不過可能較小人行,所以山徑長满樹藤雜草, 棘手棘腳比較花氣力,所以記得要著長褲和手套, 同埋兩邊長滿曬蜘蛛網,最好搵支行山杖或者樹枝開路,如果唔係會成面食哂好多蜘蛛網。 一直沿山腰行,風景開揚水質清澈, 行咗大約1.5小時,卒之到達綠蛋島,外形真係好似一隻煎熟嘅雞蛋,好可愛。拍完卡後繼續上路,好快就到達刀片脊, 由於山脊好狹窄, 形狀好似一張刀片,所以被人稱為刀片脊,小編走到脊上,原來最窄部份都有四呎闊,而兩邊都係懸涯, 睇落去都幾驚險吓架! 繼續沿山徑走,好快就到達一個峽谷, 呢度係一條石澗,名為大雞坑,不過今日冇乜水,唔太跣腳,大雞坑由好多巨石形成,可以攀爬上到大嶺峒,小編横渡過呢度就接上山徑繼續上路,再走大約一公里,卒之走到終點~大坳門,近出口附近有大量大斑豹紋尺蛾飛來飛去,好似蝶變感様。大坳門呢度有多個燒烤爐,又有放紙鳶埸,每逢假期都係一家大細好去處。休息一陣之後再沿清水灣道返回起步處搭小巴完結旅程。需時約5小時。


▲清水灣騎術學校經過小徑落到石灘起步


▲首先攀上岩石ㄧ直走


▲可以綑ㄧ段岩石再轉入山徑


▲34度高温石上走(注意:小編不建議高温行山,如必要,請帶備足夠食水!!)


▲沿途風景秀麗


▲沿途風景秀麗


▲山徑有許多樹藤雜草-每行一步都特別艱辛


▲向綠蛋島出發


▲遠眺綠蛋島


▲如果要登錄綠蛋島-必須留意潮汐時間


▲到達刀片脊


▲刀片脊兩邊是懸崖行走相當驚險


▲遠晀大雞坑


▲跨越大峽谷


▲由大雞坑可直攀上大嶺峒


▲沿途上落坡幅不算太大


▲好不容易走到終點大坳門


▲大坳門每逢假日都有大批遊客前來燒烤郊遊

 

綠蛋島刀片脊
路線: 清水灣道>龍蝦灣路>清水灣騎術學校>平托坑山>綠蛋島>刀片脊>大嶺峒>大雞坑>饑死雞>大坳門 全程約6.5公里

注意:
⚠大部份路線需要穿越山林,比較崎嶇,建議由經驗人仕帶領
⚠如登陸綠蛋島,留意潮汐時間
⚠路徑明顯,有絲帶引領,樹藤雜草茂密,建議穿長袖衫,長褲
⚠愛護山野清潔人人有責,自己垃圾自己帶走

交通: 官塘乘坐103小巴去達勝記士多小食店落車起步
路線參考:https://bit.ly/2J4lz1L

Tagged with:     , , ,

Follow us

合作查詢

歡迎與我們聯絡, 查詢合作