香港人遊香港

【怪異傳聞滿天飛行山線!探索牛屎湖廢村!】

[駐場博客 @小牛牛快樂行山郊遊相集by Chan Keung]有日和朋友一齊行山,問佢想行邊鼠?佢話最近D佢屋企(大埔),易行,又有湖畔靚景! 小編揾咗一輪,决定去新界東北一帶嘅牛屎湖啦! 風景真係好靚,但係第二日佢話比我聽,上網睇過,原來牛屎湖村傳聞好猛鬼,聽到心寒而慄!今次同大家揭開牛屎湖神秘面紗!由大埔墟小巴站坐20R小巴,大約半小時到達烏蛟騰,首先入村經過九擔租, 依家鋪晒水泥路好易行,路邊又整晒好多長石屎枱凳,同多年前好唔同,行咗2公里左右,到達犁三古道,呢段有番D郊野感覺了,泥石路緩緩而上,風景開揚,好快就到達犁頭石, 途中見到一棵巨樹,前面有個牌介紹,原本名叫~五月茶(五味子) , 打卡後一直到達三椏灣, 呢度啲土質好得意,你會發現全部都係紅色,點解係紅色? 自己上網揾答案啦!
小編本來想綑邊(沿海邊步行)進入西流江,再到牛屎湖,但係冇睇到潮漲時間,D水位好高綑唔倒邊,所以唯有經牛屎湖山去牛屎湖,首先經過一個公廁有一條好隱蔽嘅小路, 行咗上去之後, 初段好斜好多蚊,同埋十分陰森, 不過行咗一段之後就開始開掦,條路都算好行,冇乜上落坡幅,行到途中又見到一大群好似蝴蝶嘅東西,原來叫做大班 豹紋尺蛾, 色彩鮮豔,通常都住在同一棵樹枝上,有幾十隻飛來飛去,好靚呢!再繼續行,又見到有一隻箭豬,小編都係第一次見到,不過呢一隻係一條屍體已經腐化咗, 再沿山徑走,見倒前面有一條古舊廢村, 有好多座房子,有古井,仲有D碗碗碟碟,仲有D家居用品,好似有人住,但係就佈滿晒苔蘚,奇奇怪怪,旁邊有好多樹藤,有D陰森。影完相之後急急腳,卒之落到牛屎湖,有内湖和外湖,内湖望落去綠油油,應該水底有好多綠色植物,小編見到有D大魚跳上水面,好得意。而走到外湖,十分平靜,平面如鏡,形成一度倒映,好靚喔! 隔離仲有個小碼頭,將成為打卡熱點。睇睇時間已經好晏,立即沿路返回三椏村,經過三椏涌, 小編發現已經同過往完全不同, 政府為呢段路鋪設咗好多木板梯級,方便遊客進出, 進入苗三古道, 整條路都鋪設過相當易走, 之後路上又發現小紅蟹, 又要拍過夠本, 不久到達苗三石澗, 呢度水質清澈,長滿了水養植物,十分翠綠,好似入咗原始森林一樣,之後再經過上苗田下苗田返到烏胶騰坐小巴回家。返到屋企朋友send咗有關牛屎湖村嘅傳聞比小編,内容描述多年前,有一街渡正前住牛屎湖,本來風平浪静,點知突然刮起怪風,街渡翻沈,死咗好多人,果日開始晚上就有淒厲嘅哭聲,又有人大力拍門,但打開門就唔見人,村民都聯想起抗戰當年,日軍捉咗D遊撃隊,就在牛屎湖對開嘅小島(墳洲)處决,所以要揾替身,鬼話越傳越烈,所有村民一夜之間收拾細軟舉家離開,令到牛屎湖村成為而家嘅廢村。傳聞歸傳聞,讀者也不應盡信, 更加唔好錯過牛屎湖美麗景色。


▲有烏蛟騰起步經過九擔租進入犁三古道


▲到達三椏灣ㄧ片紅色土地相當有特色


▲本來打算綑邊經西流江去牛屎湖但水漲綑唔倒


▲改道從牛屎湖山去牛屎湖


▲發現有幾十隻大斑豹紋尺蛾住在同一棵樹上顏色艷麗


▲路上小紅蟹


▲箭豬的箭十分尖鋭


▲發現箭豬屍體


▲牛屎湖村


▲牛屎湖村入口滿佈樹藤有D陰森感覺


▲村内有多棟廢屋


▲牛屎内湖水面綠油油底部應該長滿了綠色水種植物不時有大魚跳上水面


▲牛屎湖外湖水面平靜


▲牛屎湖有ㄧ個小碼頭將會成為打卡熱點


▲風平浪靜形成一個美麗的倒影好似一面大鏡子


▲牛屎湖小碼頭


▲小碼頭倒映景色怡人


▲海中好多小魚


▲苗三古道


▲上苗田

牛屎湖
路線: 烏蛟騰>九擔租>犁三古道>犁頭石>三椏灣>牛屎湖山>牛屎湖村>牛屎湖>三椏涌>苗三古道>苗三石澗>上苗田>下苗田>九擔租>烏蛟騰 全程14公里

注意:
⚠路程比較遙遠 帶備足夠乾糧食水
⚠牛屎湖村十分多蚊做 足防蚊措施
⚠到訪古舊廢屋 切勿移動或破壞原有 擺設, 勿破壞歷史價值建築
⚠保護郊野清潔人人有責,自己垃圾自己帶走

Tagged with:     , , , , ,

Related Articles

Follow us

合作查詢

歡迎與我們聯絡, 查詢合作